t Evengelie volgens Lucas 10
01Noa dij gesprekken wees de Heer nog twijenseuventeg aandern aan en stuurde heur twij bie twij veur zok oet noar elke stad en elk dörp tou doar e zulm ook hèn wol.
02Hai zee tegen heur: "Der is n bult koorn riep, mor aarbaiders binnen betuun. Ie maggen doarom boas van t laand wel beden of e aarbaiders aan t zichten zet.
03Goa den op pad! Denk ter om: ik stuur joe as lammer middenmaank wolven.
04Ie mouten gain pong, gain mat en gain schounen droagen. En onderwegens mit gainain n proatje moaken.
05Wat hoes ie ook inkommen, zeg eerst: 'Zegen over dit hoes.'
06As doar ain woont dij joe toudoan is, den blift dij touzeggen veur hom gelden. En aans wordt e weer introkken.
07Blief in zo'n hoes. Eet en drink wat of ze joe toulangen. n Aarbaider is zien loon ja weerd. Goa nait aalweg van t aine hoes noar t aander.
08As ie in n stad kommen doar ze joe vrundelk opnemen, den eet wat of ze joe veurzetten.
09Moak doar zaiken weer beter. En zeg tegen heur: 'God zien riek is stoef bie joe kommen.'
10 Mor as ie in n stad kommen doar ze joe nait opnemen doun, goa doar den stroaten op en zeg:
11 'Alderdeegs t stof van joen stad dat aan ons vouten zit, veeg wie òf as n aanklacht tegen joe! Mor wait dit wel: God zien riek is stoef bie.'
12 Ik zeg joe: Sodom zel der op dij dag beter ofkommen as zo'n stad.
13 O wai die, Chorazin! O wai die, Betsaïda! As in Tyrus en Sidon zokse staarke dingen gebeurd wazzen as bie joe, den haren ze al laank in zak en aask zeten en zok bekeerd.
14 Mor Tyrus en Sidon zellen der in t oordail beter ofkommen as ie.
15 En doe Kafarnaüm, mainst dastoe aan hemel tou verheven worden zelst? In t dodenriek zelstoe te laande kommen!
16 Wèl of noar joe lustern dut, lustert noar mie. Wèl of van joe niks waiten wil, wil ook van mie niks waiten. En wèl of van mie niks waiten wil, dij wil ook van hom niks waiten dij mie stuurd het."
17 De twijenseuventeg kwammen blied weerom en zeden: "Kwoaie gaisten binnen ons ja alderdeegs onderdoaneg as wie joen noam nuimen!"
18 Hai zee tegen heur: "Ik zag Soatan as n weerlichtslag tou hemel oetvalen!
19 Kiek es hier: ik heb joe macht geven om boven op slangen en schorpiounen te trappen. En ik heb joe macht geven tegen t haile leger van vijand. Der is niks dat joe n spier kwoad doun zel.
20 Mor toch mout ie dóár nait blied om wezen, dat gaisten joe onderdoaneg binnen. Mor dóárom, dat joen noamen te bouk stoan in hemel."
21 Op dat aigenste ogenblik jubelde hai t oet deur hillege Gaist en zee: "Ik daank joe, Voader, Heer van hemel en eerde, dat ie dit veur wiezen en verstandegen bezied holden hebben, mor aan kinder bekendmoakt. Joa, Voader, zo wol ie t ja hebben.
22 Ale dingen binnen mie aanvertraauwd deur mien Voader. En gainain wait wèl of Zeun is as allain Voader. En gainain wèl of Voader is as Zeun, en dijent dij t bekendmoaken wil."
23 Dou draaide hai zok om noar leerlingen en zee tegen heur allain: "Zoaleg dij ogen het dij zain wat of ie zain.
24 Ik zeg joe ja: hail wat profeten en keunenks haren geern zain wat of ie zain. En geern heurd wat of ie heuren doun. Mor ze hebben t nait te heuren kregen."
25 Dou kwam der n wetgeleerde aanzetten dij hom in verlegenhaid brengen wol. Hai zee: "Meester, wat mout ik doun om t aiwege levent te aarven?"
26 Jezus zee tegen hom: "Wat staait ter in wet? Wat lees ie doar?"
27 Hai antwoordde: "Ie zellen de Heer, joen God, laifhebben mit joen haile haart, mit joen haile zail en mit aal joen kracht en mit aal joen verstand, en joen noaste as joezulm."
28 Hai zee tegen hom: "Dat heb ie goud zegd! Hol joe der aan. Den zel ie leven."
29 Mor hai wol zok grootholden en zee tegen Jezus: "En wèl is mien noaste den?"
30 Doar ging Jezus op in. Hai zee: "Der was ain onderwegens van Jeruzalem noar Jericho tou. Hai vuil in handen van rovers, dij hom oetschudden deden. Boetendes gavven ze hom ook nog sloag. Dou ze votgingen luiten ze hom haalfdood liggen.
31 Dou wol t gevaal dat ter n priester langs kwam. Dij zag hom en ging der mit n boog omtou.
32 Net zo n Leviet: hai kwam doar langs, zag hom en ging der mit n boog omtou.
33 Mor n Samaritoan, dij op raais was, kwam der ook langs. En dou hai hom zag, kreeg e mit hom te doun.
34 Hai ging noar hom tou en verbon zien wonden, doar e eulie en wien op dee. Hai zette hom op zien aigen daaier, brochde hom in n haarbaarg en zörgde wieder veur hom.
35 Aanderdoags dou e votging, gaf e kastelaain twij schellenks en zee: 'Zörg veur hom. As ie meer kostens hebben den zel ik joe op weeromraais betoalen.'
36 Wat ducht joe, wèl van dizze drijent het zok as noaste gedroagen van man dij in handen van rovers valen was?"
37 Hai zee: "Dij barmhaarteg veur hom west het." Jezus zee: "Goa hèn en dou ie net zo!"
38 Dou ze wiedergoan wazzen, kwam e in ain of aander dörp. n Vraauw dij Marta haitte, ontvong hom in heur hoes.
39 Zai haar n zuster dij Maria haitte. Dij ging aan de Heer zien vouten zitten en lusterde noar zien woord.
40 Mor Marta haar handen vol mit bedainen. Zai ging bie hom stoan en zee: "Heer, ligt joe der niks aan gelegen dat mien zuster mie t aal allain doun let? Zeg heur toch, ze mout mit aanpakken!"
41 Mor de Heer zee tegen heur: "Marta, Marta, doe moakst die bezörgd en drok over veulsteveul.
42 Der is mor zo'n beetje neudeg. Of ainlieks mor ain ding! Maria het dat goie dail oetkozen en dat zel heur nait ofnomen worden!"
|
